Ish-ambasadori i Misionit Verifikues të OSBE-së në Kosovë, William Walker, ka vlerësuar se kryeministri i Kosovës, Albin Kurti, nuk po e trajton mirë marrëdhënien me SHBA-në.
Walker ka thënë se ka dëgjuar nga njerëzit që Kurti po e lufton korrupsionin, po vendosë njerëz të mirë nëpër pozita, porse nuk po e trajton si duhet marrëdhënien me SHBA-në.
“I kam pyetur njerëzit se si po qeveris Kurti. E njoh Kurtin qe 24 vjet, por e kam takuar vetëm një herë prej se është kryeministër. Kam dëgjuar nga njerëzit se po merret me luftën kundër korrupsionit, po provon të vendosë njerëz të mirë nëpër pozita, jo vetëm të Vetëvendosjes, po e bën këtë e atë. Por ai nuk është duke e trajtuar mirë marrëdhënien me Shtetet e Bashkuara në mënyrë e duhur. Kurti po sjell çështje dhe po bën gjëra të kundërta para fytyrës e kundërshtimit amerikan”, ka thënë Walker.
Ai ka thënë se Kurti po vepron ashtu si mendon se është në interesin më të mirë të Kosovës.
“Mendoj se ai mendon se qëndrimin që e merr është në interesin më të mirë të Kosovës dhe se ai është interesi parësor. Ai duhet të dijë se njerëzit nga Washingtoni, Beogradi apo nga kudo, që vijën dhe kërkojnë diçka që Kurti mendon se nuk është në interesin më të popullit të tij, ai duhet të thotë jo. Të tregojë vijat dhe të thotë jo. Dhe ai e ka bërë një gjë të tillë në disa çështje që e kanë mërzitur komunitetin ndërkombëtar, e kanë zemëruar. Ata po i thonë se nuk po dëshiron të nënshkruajë këtë marrëveshje e Kurti po iu thotë: “Hej njohja është e rëndësishme”. Këtu bie fjala, pse çështja e targave nuk ka kuptim. E po ashtu që në veri një numër i njerëzve marrin instruksione nga Beogradi apo dërgimin e agjentëve nga Beogradi për të bërë atë që agjentët e Beogradit bëjnë. A pajtohem me të bërat, me ato që po bën apo që do të bëjë Albin Kurti? Me siguri se jo. Por unë vërtet besoj se ai po i bën gjërat që mendon se janë në të mirë të qytetarëve të Kosovës, dhe asgjë që përbën rrezik për Kosovën. Për këtë i duartrokas”, ka deklaruar Walker.
Ai ka thënë se para disa vjetësh nuk ka menduar që Lëvizja Vetëvendosje do të arrinte suksese të tilla.
“Para disa vjetëve e kam ndihmuar Vetëvendosjen të bëhej parti, dhe ia dolën. Askush s’i mbështeste, dhe natyrisht se jo se jo Ambasada amerikane, apo ambasadori amerikan atëkohë i cili thoshte se këta janë një grup fëmijësh në rrugë që vetëm duan të shkaktojnë probleme… As vetë nuk e kam menduar se do të korrin rezultate të cilat i korrën, por gjatë viteve ata arritën të fitojnë vota më shumë se çdo kush më parë në Kosovë. Mendoj se ai po i përfaqëson njerëzit të cilët e kanë zgjedhur atë që është themeli i demokracisë”, ka thënë Walker.
Ai ka folur edhe për ambasadorët e SHBA-së në Kosovë dhe Serbi. Walket ka theksuar se është befasuar kur ka dëgjuar se Christopher Hill po shkonte ambasador në Beograd.
Ndërsa për ambasadorin e SHBA-së në Kosovë, Jeffrey Hovenier, ka theksuar se është ambasador me shumë aftësi, por se është ambasador për herë të parë.
Ai ka vënë në pikëpyetje balancën mes një diplomati senior dhe një diplomati më junior.
“Mund të thuash: po Beogradi, është Serbia. Një shtet më i madh. Nuk kam asgjë kundër Chris Hill-it. E admiroj për atë çfarë ka bërë gjatë karrierës së tij. Vetëm se brengosem se raportet që do të vijnë nga Beogradi dhe Prishtina në Departamentin e Shtetit, s’jam i sigurt që do të shihen me seriozitetin e njëjtë. Dhe kjo më brengos”, është shprehur ai.
