Një incident i rëndë ka ndodhur në veri të Kosovës, duke shtuar kështu tensionet në zonë. Sipas policisë së Kosovës, në Bistricë të Leposaviçit janë regjistruar të shtëna me armë zjarri.
Bëhet e ditur se policia e Kosovës është sulmuar me armë nga persona që ndodheshin në një makinë në lëvizje.
Policia e Kosovës, përmes një njoftimi thotë se nga makina në lëvizje është shtënë mbi automjetin e efektivëve, duke rrezikuar drejtpërdrejtë jetën e tyre. Për të neutralizuar rrezikun, këta të fundit janë përgjigjur duke hapur zjarr.
“Njësia policore, e cila ndodhej në pikën e kontrollit në krye të detyrës, ka dashur që të ndalojë automjetin në fjalë, i cili nuk i është bindur thirrjes për të ndaluar, përkundrazi ka shtënë mbi efektivët. Të dyshuarit janë larguar bashkë me mjetin e tyre nga vendngjarja ndërsa është hapur menjëherë një hetim mbi incidentin, e është njoftuar edhe Inspektorati i Policisë së Kosovës për procedura të mëtejme”, thanë burime policore.
Drejtori i zyrës për Kosovën në Qeverinë serbe Petar Petkoviç tha se i plagosuri me inicialet M.D. është transportuar me urgjencë në spitalin e Kralevës, ndërsa shton se në rrugën Mitrovicë-Leposavic, përveç M.D, ishte edhe D.S, i komunitetit serb, i cili nuk ka pësuar lëndime.
