Xherdan Shaqiri ka thënë se nuk do të festojë në rast se shënon gol të shtunën mbrëma në Prishtinë kundër Kosovës.
Kosova do ta presë Zvicrën në “Fadil Vokrri” në ndeshjen e vlefshme për eliminatore për Euro 2024.
“Unë jam sportist, do të jap çdo gjë për Zvicrën. Por, për respekt ndaj Kosovës, nuk do të festoj në rast të shënimit të golit. Këtë gjë mund ta bëjnë kolegët e mi”, ka thënë Shaqiri për “Blick”. “Jam i bindur se do të pritemi pozitivisht. Nuk kemi pse frikësohemi se do të fishkëllehemi gjatë shëtitjeve para ndeshjes. Mirëpo, mund të llogarisim se do të fishkëllehemi nga një numër i vogël i njerëzve gjatë ndeshjes. Atmosfera do të jetë ndryshe nga miqësorja e vitit të kaluar në Zuerich”.
Shaqiri ka thënë se ka pasur afro 50 kërkesa nga familjarët për t’u siguruar bileta për ndeshje dhe u ka realizuar këto kërkesa. Ai ka thënë se ka pasur edhe kërkesa që të mos shënoj ndaj Kosovës.
“Unë isha 11-vjeçar, kur me familjen u larguam për në Zvicër shkaku i luftës. Por, dy prindërit e mi kanë nëntë vëllezër e motra, mund të paramendoni se sa familjarë do të jenë në ndeshjen e të shtunës. Deri 50 kërkesa për bileta kam pranuar dhe për fat të mirë kam arritur t’i plotësoj ato. Për shumë prej tyre, për shkak të vizave, nuk është e mundur të vijnë për të shikuar një ndeshje në SHBA apo Evrope Perëndimore. Unë gëzohem se do t’i shoh njerëzit. Shpresoj që familja të jetë më me rëndësi sesa nacionaliteti dhe familjarët të më përkrahin. Por, mbi të gjitha duhet ta shijojnë ndeshjen. Shumë më kanë shkruar, duke kërkuar që të mos shënoj gol”, tha Shaqiri.
Ai ka treguar edhe pse nuk ka vendosur të luajë për Kosovën.
“ Kur Federata u pranua në vitin 2016 për të luajtur ndeshje zyrtare, u gëzova shumë, para së gjithash për njerëzit dhe vendin. Ka pasur mundësi që lojtarët me rrënjë nga Kosova të ndryshojnë kombëtaren. Isha në bisedime me zyrtarët atëbotë. Por, më pas erdhi Evropiani me Zvicrën. Dhe për shkak se luajta atje, u zgjidh kjo çështje automatikisht”.
Shaqiri ka thënë se synim e ka që të hyjë në histori të Përfaqësueses së Zvicrës.
“Për mua është shumë e rëndësishme që tifozët zviceranë të më kujtojnë si të veçantë, si një nga lojtarët më të mirë të kombëtares. Të thonë: Shaqiri na dhuroi shumë momente të bukura”, tha mesfushori ofenziv.
Ai ka thënë se ndonëse 31-vjeçar është i lumtur sa herë që i bashkohet përfaqësueses së Zvicrës.
Ai ka thënë se Zvicra është favorit i qartë në grupin eliminator për Euro 2024.
“Ne jemi favorit të qartë në grupin tonë kualifikues dhe pritet një fitore në çdo ndeshje. Këtë e kërkojmë ne nga vetja. Barazimi 2:2 kundër Rumanisë në qershor na u duk sikur humbje. Grupi është një test i mirë për ne, për të parë se sa seriozisht mund t’i kryejmë detyrat. Nëse ia dalim mbanë, atëherë mund t’ia dalim edhe kundër ekipeve të mëdha. Andorra u mbrojt shumë mirë kundër nesh. Skuadra të tilla duan të fitojnë po ashtu këto ditë”, ka thënë Shaqiri.
Shaqiri, që është pjesë e Chicago Fire në ligën MLS në SHBA, ka treguar për efektin që ka pasur Lionel Messi në këtë ligë.
“Me Messin popullariteti i futbollit në SHBA është rritur dukshëm. Në tetor luajmë kundër Miamit, për mua nuk do të jetë dueli i parë kundër Messit, por për shokët e mi të skuadrës po”, tha Shaqiri.
Ai është pyetur edhe nëse do ta përfundonte karrierën në Arabi Saudite.
“Ndihem rehat në SHBA dhe kam kontratë atje edhe për vitin e ardhshëm. Po ashtu më pyesin edhe nëse do të kthehem te Lugano, klub partner i Chicagos. Unë jam stërvitur në Ticino vitin e kaluara para Kupës së Botës dhe më pëlqeu shumë. I përcjelli ndeshjet e Luganos. Futbolli po ecën shpejt, të shohim se çfarë do të ndodhë”, ka thënë Shaqiri.
