Presidenti i SHBA’së, Joe Biden, gjatë fjalimit të tij në Asamblenë e Përgjithshme të OKB’së në New York ka fajësuar Rusinë për krizën për ushqim në botë, duke i akuzuar ata se po gënjejnë kur thonë se sanksionet ndaj tyre janë aryseja kryesore për këtë krizë.
“Rusia po gënjen, në përpjekje për t’ua vënë fajin sanksioneve ndaj tyre si shkak të krizës për ushqim në botë. Kështu që më lejoni të jem plotësisht i qartë: Sanksionet tona ia lejojnë Rusisë eksportin e ushqimit në botë. Pa asnjë limit”, tha Biden në Asamblenë e OKB’së, raporton CNN.
“Është lufta e Rusisë ajo që po përkeqëson pasigurinë ushqimore dhe vetëm Rusia mund t’i japë fund”, shtoi Biden.
Biden lavdëroi OKB-në për ndihmën për të ndërmjetësuar një marrëveshje të eksportit të grurit me Ukrainën dhe Rusinë dhe inkurajoi zgjatjen e saj.
Ai tha se deri në 193 milionë njerëz në mbarë botën po përjetojnë pasiguri akute ushqimore, “një kërcim prej 40 milionë njerëz në një vit”.
Presidenti Biden gjithashtu njoftoi për 2.9 miliardë dollarë mbështetje nga SHBA për ndihmën humanitare dhe ushqimore.
