Kryesia e Lidhjes Demokratike të Kosovës do t’i shpallë sot zgjedhjet e brendshme në të gjitha nivelet drejtuese. Procesi nis pas disa ditësh, kurse kulmon me zgjedhjen e Kryetarit të ri të partisë më të vjetër në Kosovë. Burime brenda LDK-se thonë se Abdixhiku e ka të sigurt rizgjedhjen në postin që mban dhe se ky proces është vetëm formal.
Lumir Abdixhiku po shkon i sigurt drejt mandatit të radhës në krye të Lidhjes Demokratike të Kosovës, pas sfidave të mëdha.
Burimet thonë se Kryetari aktual e ka mbështetjen e të gjithëve.
“Deri më tash, të gjithë e kanë mbështetur Abdixhikun. Nuk besoj se do të sfidohet gjatë procesit zgjedhor”, tha një burim nga Express, brenda kësaj partie.
Lumir Abdixhiku e mori partinë pas humbjes së madhe në zgjedhjet e 14 shkurtit 2021 dhe gjatë kësaj kohe ai ka çuar në këmbë një parti të rënë përtoke. Nga 12%, nën drejtimin e tij, LDK fitoi Prishtinën në zgjedhjet lokale dhe udhëheqë në 8 komuna tjera. Kurse, njerëzit e afërt të tij thirrën në sondazhe që e nxjerrin LDK’në partinë e dytë në vend.
Gjatë kësaj kohe, Abdixhiku ka arritur të sjellë profile të reja profesionale nga fusha të ndryshme.
Nëse Abdixhiku zgjidhet në krye të LDK’së, ai do ta marrë një mandat të plotë katër-vjeçar, meqenëse në 2021 ai kishte vazhduar mandatin e ish-Kryetarit Isa Mustafa, i cili pat dhënë dorëheqje pas zgjedhjeve parlamentare.
Abdixhiku është Kryetari i katërt i LDK’së, pas Ibrahim Rugovës, Fatmir Sejdiut dhe Isa Mustafës.
