Kryeministri Albin Kurti ka thënë se mundohet ta ndjekë rrugën e kampiones olimpike të xhudos, Majlinda Kelmendi në detyrën e tij.
Këto komente Kurti i bëri dje në demonstrimin e xhudos nga Kampionia Olimpike e Xhudos, Majlinda Kelmendi, në sallën sportive “Minatori”, në Mitrovicë.
“Të dashur nxënës, rrugëtimi i Majlindës është shembulli të cilin të gjithë ju duhet të synoni ta ndiqni në cilindo angazhim tuajin në jetë. T’ju them të drejtën, po mundohem ta ndjekë edhe unë personalisht në detyrën që kam”, tha Kurti.
Në këtë aktivitet i cili zhvillohet në kuadër të programit “Kosova, shteti i xhudos” dhe ka për qëllim promovimin e vlerave dhe sportit të xhudos, Kurti iu tha nxënësve: “Me vitin e ri shkollor, do të fillojë integrimi i xhudos në orët tuaja mësimore. Rrjedhimisht ju do të filloni të ushtroni sportin e xhudos nëpër shkollat tuaja”.
