A mund të jetë një çokollatë po aq e shijshme, por shumë më e shëndetshme?
Kjo është shpresa e studiuesve nga ekipi ndërdisiplinor në Universitetin e Leeds, të cilët pretendojnë se kanë deshifruar procesin natyror që ndodh në gojë kur hamë një copë të shijshme çokollatë.
Sipas studiuesve, cilësia e saj e shkrirjes në gojë është ajo që e bën ngrënien e çokollatës kaq të parezistueshme. Studimi u botua në ACS Applied Materials and Interface.
Sipas studiuesve, ky proces i lezetshëm që ndodh në gojën tonë kur hamë çokollatë është për shkak të yndyrës në sipërfaqen e saj, e cila qëndron si në gjuhë ashtu edhe në sipërfaqe të tjera të zgavrës me gojë, duke i dhënë kësaj delikatesë teksturën kremoze.
Ekipi i studimit ndërtoi një sipërfaqe 3D të ngjashme me gjuhën. Duke përdorur çokollatën e zezë të rafinuar, ai përdori një sërë teknikash analitike nga fusha e tribologjisë. Është një shkencë që studion mënyrën se si sipërfaqet ndërveprojnë me lëngjet, nivelet e fërkimit ndërmjet tyre dhe rolin e agjentëve lubrifikues që në rastin në studim janë lëngjet e pështymës dhe çokollatës. Të gjithë këta mekanizma aktivizohen në zgavrën e gojës kur hamë çokollatë.
Studiuesit zbuluan se ndjesia e shijshme e çokollatës është për shkak të yndyrës në sipërfaqen e saj, ndërsa yndyra brenda çokollatës luan një rol shumë më të vogël në ndjesinë përfundimtare.
“Çokollata, pavarësisht nëse është 5% ose 50% yndyrë, do të formojë pika në gojë, të cilat ofrojnë atë ndjesi kënaqësie. Megjithatë, faktori që luan një rol është vendndodhja e yndyrës në çokollatë. Hulumtimi ynë ka treguar se të qenit në shtresat e jashtme të çokollatës është thelbësore, pasi kjo duket se i jep çokollatës shijen e saj të parezistueshme”, shpjegon Anwesha Sarkar, profesore në Shkollën e Shkencave të Ushqimit dhe Ushqyerjes në Leeds.
Në bazë të këtyre gjetjeve, studiuesit dolën në përfundimin se mund të krijohet një gjeneratë e re e çokollatës, nga e cila do të mungojë yndyra e panevojshme që përmban trupi i saj, duke rezultuar që ajo të jetë më e shëndetshme, por pa mungesë shije.
“Kërkimet japin përgjigje për ndjesinë që jep ushqimi në gojë. Prandaj, ne mund t’i shfrytëzojmë këto elemente me synimin për të krijuar ushqime, të cilat do të jenë të shijshme, por në të njëjtën kohë më të shëndetshme”, thotë Dr. Sarkar.
Dr. Siavash Soltanahmadi nga Shkolla e Shkencave të Ushqimit dhe të Ushqyerit në Leeds dhe studiuesi kryesor tha: “Duke kuptuar mekanizmat natyrorë që ndodhin kur hamë çokollatë, ne shpresojmë të krijojmë një gjeneratë të re çokollatë që ofron të njëjtën ndjesi duke qenë më të shëndetshme”.
Së fundi, studiuesit besojnë se teknikat e përdorura në këtë studim mund të aplikohen për kërkime mbi ushqime të tjera me veti të ngjashme të shkrirjes në gojë, si akullorja, gjalpi dhe djathi, me synimin për të zhvilluar forma më të shëndetshme të tyre.
