Në 48 kilogramë ka shkuar sasia e marihuanës, e kapur në katër aksione të Policisë, të nisura nga 30 marsi e deri sot, 12 maj, në disa lokacione në Kosovë. Sipas një njoftimi të Policisë, 12 kilogramë marihuanë janë kapur të premten në 11 lokacione. Vlera totale e marihuanës së kapur në kuadër të operacionit “Guri” ka arritur në rreth 70 mijë euro.
Tri aksione ishin zhvilluar më 30 mars, 5 prill e 4 maj. Në këto aksione ishin gjetur e konfiskuar rreth 36 kilogramë marihuanë dhe ishin arrestuar tre të dyshuar.
Ndërkaq në aksionin e së premtes, janë kontrolluar 11 lokacione dhe si prova materiale, sipas Policisë, janë gjetur e konfiskuar 12 kilogramë marihuanë, 3467 euro, 12.700 lekë dhe tri vetura me të cilat besohet të jetë bërë bartja e lëndës narkotike.
Gjatë kontrollit një i dyshuar ka tentuar të ikën dhe duke kërcyer nga lartësia e shtëpisë ka pësuar lëndime, sipas Policisë. Në njoftim thuhet se i dyshuari është dërguar për trajtim mjekësor.
“Në tri operacionet e më hershme dhe në këtë të ditës së sotme janë konfiskuar rreth 48 kg substancë, dyshohet të jetë e llojit marihuanë vlera e të cilës është rreth 70 mijë euro, janë arrestuar nëntë të dyshuar të cilët dyshohet se kanë vepruar si grup kriminal që është marrë me ‘blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge’”, thuhet në komunikatë.
