Deklarimit të kryeministrit të Kosovës, Albin Kurti, se në rastin e shkuarjes në zgjedhje të reja parlamentare “opozita zhduket”, i kanë reaguar partitë opozitare në Kosovë.
Ato kanë kërkuar dorëheqjen e Kurtit dhe shkuarjen në zgjedhje.
Kryetari i Grupit Parlamentar të Partisë Demokratike të Kosovës, Abelard Tahiri, tha se e kundërta është e vërtetë, që “kurdo që të mbahen zgjedhjet, ai nuk do të ketë mundësi të krijojë një qeveri të dytë. Nuk do t’i ketë as numrat, as mandatin”.
“ Mendoj që favori dhe shërbimi më i madh që do t’ia bëjë sot kryeministri Kurti është që të japë dorëheqje dhe vendi të shkojë në zgjedhje. Vetë fakti që atij në mendje sot i shkon opozita, kjo tregon se ai frikën e ka pikërisht nga kjo opozitë dhe një gjë e ka të sigurt, se kjo qeveri në mandatin e ardhshëm nuk do të ketë mundësi të krijojë një qeveri të dytë”, tha Tahiri.
Pas këtij deklarimi ka reaguar edhe kryetari i Grupit Parlamentar të Aleancës për Ardhmërinë e Kosovës, Besnik Tahiri, e cili Kurtin e ka quajtur “humorist”.
“Kryeministri Kurti ia filluar të bëhet humorist, ky asnjëherë s’ka pasur kujdes për opozitën, lërë për opozitën e partive të tjera, por as për njerëzit ndryshe në partinë e vet. Nuk kujdeset për njerëzit në parti që kanë mendime të ndryshme, e lërë për partitë e tjera. Se kush sa e ka fuqinë politike na e jep populli, le të del nëse ia mban në zgjedhje dhe e sheh çka ndodh me të. Ai e dinë qe e ka humbur fuqinë elektorale politike, për këtë është bërë humorist”, ka thënë Tahiri.
Kurti sot në një konferencë i është përgjigjur thirrjeve nga opozita për dorëheqjen e tij dhe zgjedhje të reja.
Sipas tij, nëse shkohet në zgjedhje, atëherë zhduket opozita, duke aluduar kështu në fitore të thellë.
“Kam dëgjuar që opozita herë kërkon dorëheqjen e herë shkarkimin tim, e herë zgjedhje të reja. Zgjedhjet nuk i konvenojnë as qeverisë e as opozitës. Qeverisë nuk i konvenojnë zgjedhjet, sepse zhduket opozita”, tha Kurti.
