“Kjo marrëveshje i jep njohjen ndërkombëtare Kosovës”. Kështu u shpreh Kryetari i Aleancës për Ardhmërinë e Kosovës, Ramush Haradinaj, pas një takimi me ambasadorin amerikan në Prishtinë, Jeffrey Hovenier, të cilit ia paraqiti qëndrimit mbështetës të AAK-së për Plan-Propozimin e BE’së për normalizim të marrëdhënieve ndërmjet Kosovës dhe Serbisë.
Përveç atë që Haradinaj beson se kjo marrëveshje i sjell njohje ndërkombëtare Kosovës ndonëse një gjë e tillë nuk është garantuar nga askush, ai beson edhe se marrëveshja sjellë “rrugëtimin e sigurt drejt integrimit në NATO dhe forcimin e subjektivitetit ndërkombëtar”.
Njoftimi i Haradinaj:
Sot, në selinë e Aleancës për Ardhmërinë e Kosovës prita në takim Ambasadorin amerikan në Kosovë, z. Jeffrey Hovenier, me të cilin diskutuam për zhvillimet e fundit në vend.
E falënderova personalisht Ambasadorin Hovenier për angazhimin e tij dhe të ShBA-ve në mbështetje të Kosovës.
Njëkohësisht prezantova qëndrimin e Aleancës në mbështetje të marrëveshjes Kosovë-Serbi, duke theksuar se kjo marrëveshje i jep njohjen ndërkombëtare Kosovës, rrugëtimin e sigurt drejt integrimit në NATO dhe forcimin e subjektivitetit ndërkombëtar.
Partneriteti i vendit tonë me ShBA-të është afatgjatë, strategjik dhe i përjetshëm.
